墨爾本勝利大演獅吼功

猪拉多纳

當大家睇到呢篇稿嘅時候，我妹頭已經飛咗去日本啦！但唔好誤會我去「濕平」，今次都係為公事出差，不過根據上次經驗就唔多覺有日本電視台播澳職，到時惟有上番官網睇精華喇，不過早前澳職快車日日開，妹頭都有日日睇，所以仲掌握到澳職最新戰況。

上輪墨爾本勝利能夠對西悉尼流浪者保持不敗，最大功臣當然係後備上陣嘅古希美，喺補時階段射入球超靚自由球逼和對手，雖然墨爾本勝利今季有艾奇湯臣缺陣，但呢位老將已經不復當年勇，球隊入波嘅重任都係分散畀各中場如杜羅奧斯、尼高斯等人身上。
尼高斯出盡力抬身價

講起尼高斯，今場勝利對獅吼佢屬於倒戈上陣，就真係要大打身價波喇，除咗要喺獅吼面前出番口氣之外，都要話畀大阪櫻花聽佢唔只值200萬港元轉會費咁少，事關櫻花出價實在太低，勝利已經拒絕尼高斯嘅轉會。

今場對決論人腳同狀態，表面上獅吼冇得輸，但勝利居然近8次主場對住獅吼都可以保持不敗，再加上獅吼已經一年半時間未試過作客四連勝，所以妹頭都唔敢睇好獅吼再贏一仗，相反兩隊係現今澳職入波最多嘅頭兩位，強強對決，當然支持入球大睇好波仲過癮啦。

（有線64及203台周六下午4時45分直播）
妹頭推介

墨爾本勝利Vs布里斯班獅吼

墨爾本勝利（大）