四季星鬥志十足

猪拉多纳

　　今期3位騎師復出，外界梗係睇重雷神，人人盤算佢又贏幾多W，咁又難怪，話晒佢客串以來，日日有馬贏，簡直係超級贏馬機器。但咪話阿棟恃老賣老，馬場眾生相我睇得太多，歷史係不斷不斷咁重演，奉勸一句，唔好太着迷。

　　第三場四班1000米。查看「四季星」出賽紀錄，已經有1年未跑過呢項路程，告仔之前為乜會咁做？又為乜呢次咁做？我唔會亂估，不過，呢匹馬已多次由阿巫操刀，唔再畀徒弟仔蔡明紹沾手，好明顯係想加強配搭，整番W交代，基於呢點，今次回到曾經勝出嘅路程，唔會冇鬥志。

　　第七場三班1600米。「神聖火炬」上季呢程贏得「幸運聖」、與「首飾多寶」串Q，三班應該係惡到暈至啱。今季跑兩場成績普通，原因諗唔通，唯有係推在未熱夠身呢個問題上。

　　今次「神聖火炬」跑到季內第3仗，加程至1600米配合，老拍檔安安未放手，畀埋呢次機會佢。

　　第十場二班1000米。「花月佳期」路程性能受到先天限制，1200米唔係唔得，在外地跑近過，在港亦曾上名，好似上次咁，咪喺谷中1200米攞到個第三，但睇到隻馬末段爆發力唔夠，肯定冇1000米咁把炮。

　　花月佳期有卡士

　　大摩呢次安排「花月佳期」跑番直路賽1000米，好過在谷中要睇檔位做人，部署來得實際，只要隻馬跑出水準，呢假假哋贏過「跑寶貝跑」，卡士十足㗎。

　　陳華棟 資深評馬人