曼聯水鬥水擒天鵝

猪拉多纳

莫耶斯要搶盃交貨

今晚英格蘭足總盃第3圈（64強）爆發「頹兵大戰」，由曼聯主場鬥史雲斯！紅魔家陣蟬聯英超嘅機會相當渺茫，莫耶斯想交差惟有喺盃賽搏殺啦。既然前鋒韋碧克狀態大勇，要喺主場搞掂對手「天鵝」照計冇難度，一於力捧2.05倍「讓主」！

（now621、633及660台周一凌晨0:30直播）

家陣曼聯十足落水狗，唔止英國傳媒日日搵佢哋插水、戰績差到破紀錄等負面消息嚟講，連佢哋上年夏天幾乎買到嘅羅馬中場迪羅斯，都突然走出嚟講風涼話：「如果我嗰陣去咗曼聯嘅話，依家肯定想自殺呀！」咁又係嘅，「雌狼」家陣喺意甲穩佔次席，反觀紅魔只係做緊「英超7仔」，想後上爭冠難度極高，「被選中的人」莫耶斯如果唔想喺季尾收大信封，喺盃賽就要醒醒定定交足貨喇！
迪羅斯抽水：踢紅魔會自殺

雖然曼聯兩大王牌前鋒朗尼同尹佩斯都傷咗，但小妹相信近況大勇嘅韋碧克，足夠領軍射爆史雲斯，佢喺近4場賽事勁入3粒，絕對係英超最炙手可熱嘅前鋒之一，加埋香川真司相信終於有機會落場騷下「哥利」，拍住技術唔錯嘅小將贊奴沙，有力做番場「Good Show」。
史雲斯防線勁失波

紅魔實力係大不如前，但史雲斯嘅戰績同樣差強人意，佢哋近7場未贏過波兼得6個士哥，進攻主力米捷同柏保路靴南迪斯齊齊打柴，火力自然唔多掂，就算當正曼聯係仇人嘅前紅軍中場舒維爾愈踢愈成熟，靠佢同韋菲特邦尼兩個數胡，實在冇乜保證。加埋佢哋近14場得1次保得住清白之身，咁嘅防線作客曼聯隨時大敗一場啦！
Data King 曼聯近戰旺開大

‧紅魔近7戰取得6勝1負，得3場有失波。

‧曼聯近6戰有4場開入球大。

‧史雲斯近5次對曼聯獲1和4負，其中4場取得入球。
乜都玩錦囊 史雲斯鬥攻捧入球大

曼聯以韋碧克為首嘅鋒線要o趙史雲斯幾粒當然冇問題啦，最弊紅魔今季條防線間中會魂遊太空，史雲斯射手韋菲特邦尼上仗對曼城梅開二度，似乎又衰唔晒，今場隨時偷雞整番粒，加埋米高盧特立嘅領軍風格照計會同曼聯鬥攻，1.59倍入球大都值得捧o架！
英總賽制

英總今輪為第3圈賽事，若90分鐘內打和則重賽；若重賽再和，則需加時決勝負，若加時仍未能分高下，再互射12碼決定晉級隊伍。