巴塞強鋒吹襲 艾爾切冇運行

猪拉多纳

西甲「一哥」巴塞隆拿今晚會喺主場撲擊升班隊伍艾爾切，「地上最強」11月尾12月頭連輸兩場，好在一眾中前場球員即刻用行動反擊，喺歇冬前連贏5場兼喪入20個「士哥」開心過聖誕，證明有冇美斯在陣都一樣掂。雖然巴塞喺2014年第一擊仍然冇美斯，不過張峰相信巴塞都可以輕鬆響頭炮搵艾爾切祭旗，同主場球迷開個新年派對，就算讓到「-2」，1.65倍嘅「讓球主勝」都可以放心捧。

（now632台周日晚11:00直播）

巴塞一個禮拜後就要造訪馬體會上演榜首大戰，呢場波為造勢又好，為賀新歲都好，斷估點都唔會小勝收韁咁樣衰。巴塞歇冬前最後一仗作客基達菲，早段落後兩球嘅劣勢下，有驚無險憑柏度洛迪古斯大帽子戲法，加上法比加斯梅開二度反勝5:2，證明一眾球星已經適應美斯缺陣帶嚟嘅影響，亦反映出「地上最強」嘅戰意同後勁係幾咁堅！
艾爾切近5場輸4場

查實喺歇冬期間，美斯已經猛咁操波，雖然尋晚公布嘅18人名單依然冇美斯份，但有尼馬、柏度孭飛嘅鋒線足夠炒起艾爾切有餘啦o架！艾爾切今季一直喺聯賽榜中下游掙扎，歇冬前5場比賽只係得1和4負劣績，今仗無論士氣、質素同狀態都輸成條街，仲要造訪魯營面對今季西甲主場全勝嘅巴塞，筆者點睇都唔覺佢哋會有機會爆冷，好話唔好聽，今晚艾爾切真係九死一生，輸少球都偷笑！