霹靂槍久疏戰陣

不死鸟

勞動節賽日有兩匹新自購馬登場，昨文介紹過「緣耀光輝」，今日再揭另一駒「霹靂槍」的底蘊；這匹「鴻霸之星」同主馬，兩歲響新西蘭出賽五次，全部為1000至1200米短途，頭三場取得一冠兩季，之後加面箍跑兩場表現唔理想，可歸咎對手增強，較差一次於表列賽跑第十，另一場讓磅賽輸畀「開心風采」得第五，所負距離達五個馬位，兩駒實力明顯有分野。
血統方面，老豆「選擇」為澳洲短途王者，一生七勝1000及1200米，重要戰役是遠征英國，於雅士谷金禧錦標一級賽突圍而出，03年開始投身種馬行列，現時南北半球子嗣中，至少已有四駒贏出二級賽，來港的「豐綵」響英國贏過1600米表列賽，其他同系馬「美妙選擇」和「火耀雷霆」已獲勝，亦以一哩最擅長，有理由相信此系馬頗受下線影響，睇番「霹靂槍」之母曾六勝最長至1500米，目前只三歲性能仍圍繞短途為主，不排除全熟後可跑長一點，但因為已有一年無正式比賽，看來須經一番熱身才可提升水準，能力有待驗証。