曼城主場-2起筷

猪拉多纳

韋斯咸散晒送羊入虎口

英格蘭聯賽盃四強戰首回合，英超富豪球會曼城主場迎戰頹爆球隊韋斯咸，「錘仔幫」上場足總盃派出大批U21小將結果大敗收場，教頭艾拿戴斯雖獲老細發公開信撐腰，但已辣着所有fans，大軍仲有護級大戰後顧，今次隨時畀藍月亮炒多鋪，曼城「-2」冇有怕，照捧讓球主勝！

（TVB 301周四凌晨3時45分直播）

韋斯咸低處未算低，主帥艾拿戴斯上場足總盃採取放棄態度，派出半隊小將Hea踢，結果被英冠球隊諾定咸森林大炒5比0，超羞家！「錘仔幫」人腳有限又多傷兵，艾拿戴斯留力好正路，不過呢場敗仗亦傷盡粉絲心，即使蘇利雲同高特馬上發公開信力撐大Sam，但其帥位仍然不穩，現時隊內氣氛好曳，前境唔多樂觀。
四強首回合盡數

曼城同樣接連應付兩場盃賽，上次足總盃排陣唔算好強，班波尾段撻唔着，明顯因為有後顧。曼城今季主強客弱，本土聯賽連盃賽主場十一戰全勝，當中包括大炒曼聯、熱刺及阿仙奴等實力分子，趁住首回合有主場之利，必定毫無保留盡數對手。射手尼格度及迪斯高都具分量，「錘仔幫」防線唔齊腳，好有機會連番失守。

韋斯咸下場聯賽會作客卡迪夫城打護級大戰，貴價中鋒安祖卡路爾復操冇耐仲未踢得，現時隊內射手冇個掂，後防重心占士哥連斯又未好番，攻守俱弱，欠缺反擊之力，今仗大敗機會甚高。