曼城「大」開殺戒

猪拉多纳

韋斯咸唔識死搵黑仔救駕

「失魂領隊」英聯盃4強「大」鬥法！曼城今季火力驚人，領隊比歷連尼套進取戰術明顯使得，不過呢位「白頭佬」繼歐聯計錯數之後，上場英總又因為撈亂Number換錯人成為笑柄，今晚英聯盃4強首回合出擊當然唔可以再出醜，喺無敵主場出戰肯定想搵韋斯咸祭旗，中位數係3.5球嘅1.92倍「大」點可以唔捧呀？

（TVB301台及廣東體育周四凌晨3:45直播）

比歷連尼喺12月頭計錯數，歐聯最後一輪分組賽尾段收韁錯失爬拜仁頭爭首名出線資格良機，繼而再喺剛啱場英總第3圈（64強）換錯表現優異嘅尼格度離場，搞到曼城要同布力般重賽。
主場全勝入43球

比歷連尼係就係懵咗啲，但旗下隊曼城勝在有實力加上兵源雄厚，預計畀人笑到面黃嘅「工程師」，今仗會派番高柏尼、耶耶托尼等喺英總做後備嘅球星擔正，前線就以迪斯高夥拍尼格度呢對「雙塔」攻堅，以曼城今季本土賽事主場11戰全勝兼入43球嘅表現，要入韋斯咸兩、三粒容乜易吖？

睇小韋斯咸皆因佢哋後防甩皮甩骨，計落就有雲斯頓列特、湯堅斯同占士哥連斯三位後防主將養緊傷，加埋「大聲公」路蘭要坐波監，中後場冇晒領袖，難怪「錘仔幫」近5場勁失16球啦！韋斯咸領隊艾拿戴斯勁重視今場大戰，啱啱喺第3圈英總作出9個變動，卒之球隊勁吞森林5隻光蛋。

賽前韋斯咸搵嚟「黑腳」狼隊守將羅渣莊臣幫手，但係呢位30歲中堅先後搞到伯明翰、狼隊降班，隨時帶埋成身霉氣過去。

亨格比利咁睇，「懵Sam」亂咁調兵遣將辣着班Fans，今鋪去到曼城地頭點都要挽回些少面子，預計唔會死守，捧入球大啱數。