蘇斯達維拉利爾做大龍鳳

猪拉多纳

另一場西盃矚目對決，弗到爆燈嘅皇家蘇斯達主場硬撼維拉利爾，自從放下歐戰包袱後，蘇斯達於國內賽場連勝4場，勇勢有餘未盡，鋒線雙子星基沙文及卡路士韋拿腳風勁順，不過「黃色潛水艇」箭頭烏捷亦鹹魚翻生，今仗癲鳳鬥狂龍實多波入，大盤乃不二之選。

（周五凌晨2時30分開賽）
基沙文烏捷鬥射術

蘇斯達今屆雄心勃勃重返歐聯，點知經驗不足分組賽包尾收場，連下半季歐霸都冇份踢，不過冇咗呢個歐戰負擔，蘇斯達專攻國內賽事反而仲好，連西盃在內佢哋已經4連勝，喺聯賽升番上第5位，有力爭取來屆歐聯入場券。蘇斯達迅速反彈，與前線雙子星基沙文及卡路士韋拿不無關係，兩人配合心有靈犀，腳風又順番，蘇斯達近4仗怒轟14粒，佢哋就佔咗一半，重拾上季水準。

不過客軍維拉利爾亦非善男信女，上仗作客以5比2大炒華歷簡奴，尼日利亞30歲箭頭烏捷大演帽子戲法，老而彌堅，其拍檔佩比亦省兩粒，加埋墨西哥前鋒杜斯山度士於後備席枕戈待發，心雄之下隨時同蘇斯達鬥攻。既然雙方前鋒都咁弗，勝負難料，斯維認為1.8倍嘅入球大更加值博。