噴射機勝利開大片

猪拉多纳

防線豆腐 鬥攻好過

妹頭依家喺日本，唔知香港乜嘢天氣，反而知道美國嗰邊受暴風雪吹襲，仲凍到死人添。我呢邊都好凍呀，因為我上咗本州有個叫八甲田嘅雪山，啲雪大到伸手不見五指，浪漫啲形容就白蒙蒙、好似仙境咁；實情係同行工作人員畀啲雪「撇」到塊面，要貼膠布囉！試問香港人點想像到雪會有咁大殺傷力。

同樣難以想像嘅仲有澳職紐卡素噴射機，呢隊波飄忽不定，明明前排仲係贏波一條龍，點知最近就變成輸波一條蟲。佢哋今日主場對墨爾本勝利，勝利上輪亦畀布里斯班獅吼重擊，打窒道氣。雙方今仗都殘陣，噴射機陣中有四個後生仔去咗阿曼踢U22亞洲國家盃，勝利就有利查停賽，同埋柏保路干查拉斯、隊長米利根等人受傷，鬥撼之下邊隊可佔上風贏波？真係要臨場睇過至知。
尼敦般斯臨別做好戲

大家睇開澳職都知，呢兩隊波向來着重進攻，防線就似豆腐。噴射機嘅尼敦般斯正正喺上次雙方對賽時射入過兩球，佢踢埋今場就借用完畢要返仁川聯，臨走就梗希望拍住阿當泰加特做多場好戲。

墨爾本勝利上輪對住獅吼輸鑊甘，但實情係佢哋大無畏咁同獅吼對攻。缺陣5場嘅艾奇湯臣今仗有機復出，可望增加球隊攻力，各位今日下晝一於買定花生等睇「大」波啦！

（有線64及203台周五下午4時30分直播）