車仔勒唔住作客打老虎

猪拉多纳

車路士今晚打「老虎」，作客鬥侯城，車仔狀態弗到漏，聖誕新年快車三戰全勝之餘，足總盃亦晉級，最重要係一班前鋒逐漸重拾射門鞋，開始發揮球隊整體威力，依家勒都勒唔住。「老虎」侯城實際上係「病貓」，遇上豪門即腳軟，往往捧蛋收場。以侯城欺善怕惡嘅流弊，今仗猶如螳臂當車，實在冇得鬥，客W熱爆，直取讓球客勝。

莫連奴回巢初期，霸氣不及當年，主因係要埋首苦幹，重新執番正球隊。經過半季努力，車仔重現冠軍相，後防少咗季初嘅低級甩漏，近五仗只失一球，進攻上終於見番前鋒入波，伊度奧及費蘭度托利斯近兩場聯賽先後建功，成功克服最弱一環。唔好忘記，夏薩特、奧斯卡杜斯山度士、韋利安都擁有上乘破門能力，進攻更立體及多元化，令對手防不勝防。車路士只係落後榜首阿仙奴兩分，一輪賽事足以從後趕上，爭標鬥心非常強烈，絕對唔會放過侯城。
侯城遇強無力還擊

侯城今季最威係爆冷贏利物浦，但睇番首循環對車路士、曼城、熱刺、阿仙奴、曼聯，都輸波收場，上輪再鬥紅軍，亦打回原形，淨吞兩蛋。睇番侯城呢六場敗仗，有五場冇波入，其中四場淨輸兩球，可見佢哋遇上勁旅，根本冇得打，只能束手就擒。
now 621直播