米禾爾新帥領軍打劫哈特斯

猪拉多纳

正所謂有麝自然香，現於英冠排尾四嘅米禾爾，打晒鑼搵教頭搵咗一輪，終於畀佢哋執到件筍貨，就係升班專家荷路維。

與頂級冠軍領隊如費格遜、莫連奴、雲格等唔同，有啲教頭未必教得掂英超，但喺次級聯賽特別吃香，喺限米煮限飯之下化腐朽為神奇，荷路維先後帶領黑池及水晶宮衝上英超，創造奇迹。今季季初因戰績欠佳，加上英超壓力太大，令荷路維與水晶宮和平分手，決定休息一排，最終梗係揀一個適合自己嘅工作環境出山。
搶分護級難唔倒荷路維

雖然米禾爾只領先尾三嘅唐卡士打一分，護級形勢水深火熱，不過對英冠熟到爛嘅荷路維嚟講，「衝超」都成功咗兩次，帶隊護級絕對係簡單任務。米禾爾本身實力唔曳，咁啱荷帥擅於激勵士氣，新帥效應不容小覷，頭炮作客哈特斯菲爾德有得受讓值得一試。

（周六晚11時開賽）