侯城車路士合演入球大騷

猪拉多纳

目前僅落後英超「一哥」阿仙奴2分嘅車路士，今晚作客侯城3分志在必得，咁啱對手侯城唔識死，賽前講明唔會踢守勢波博1分。既然雙方都有意鬥攻，嫌1.47倍客勝冇肉食嘅朋友，不妨轉追1.92倍入球大仲抵玩。

（now621台周六晚8:45直播）
「老虎仔」主場火力猛

侯城主要靠主場搶分，預期佢哋今晚場波唔會縮，守將居迪斯戴維斯日前接受官網訪問仲講明，班波會好似早前鬥曼聯一樣採取主動，兼有信心可以攻破車路士大門咁話。事實上，呢隻「老虎仔」近4戰主場合共轟入11球，面對利物浦同曼聯亦合共省入5粒。再者，上仗足總盃對米杜士堡刻意收起唔少主力，好似射手恩歷克沙保、中場侯度史東等人抖到夠出戰自然有貨交，難怪佢哋信心十足。

「藍戰士」領隊莫連奴就從來唔驚對手主動出擊，以伊度奧、奧斯卡杜斯山度士、夏薩特為首嘅鋒線最近亦輪住開火，今場有更多空位發揮下，相信更易攞到「士哥」。考慮到「藍戰士」昔日鐵血防守不再，主力伊雲洛域又因傷缺陣，今場未必咁易全身而退。