主場惡霸打橫行馬體會玩殘蝙蝠

猪拉多纳

哥斯達發火誓破入球荒

今晚係盃賽之夜，守尾門有馬德里體育會火併華倫西亞，合演西班牙盃16強次回合大戰。馬體會首回合作客打和1:1，唔算有乜優勢，但佢哋今季喺卡達朗球場惡到打橫行，適逢射手迪亞高哥斯達連續3場冇波入，今晚對住後防穿大窿嘅「蝙蝠軍團」正係打破入球荒良機，1.9倍「讓主」要捧場啦！

（開賽時間：周三凌晨4:30）

巴塞隆拿係西甲「半季冠軍」，但查實馬體會只係因為得失球差屈居第2，咁嘅戰績真係有晒交代。「床單兵團」今季有望打破「皇巴」壟斷局面，其中一個原因係主場表現夠晒霸氣，今季15次主場賽事就錄得13勝2和佳績，強如巴塞上場聯賽去到卡達朗球場都要失分，就知馬體會主場有幾堅。
馬體會主場15戰13勝

除咗中場堤亞高文迪斯右腳(月爭)有傷唔踢得，可能好多球迷亦都擔心迪亞高哥斯達嘅近況，係，呢位射手已經連續3場冇波入，但有睇上場西甲嘅球迷，都知佢一攞親波起碼會引嚟兩位巴塞球員夾擊，冇波入真係情有可原。但睇佢幾下二傳、快速入楔同高難度施射，證明佢仲係好Fit、好想入波，今晚正正係佢老哥發威嘅良機！
華倫中後場穿窿

事關華倫西亞上輪聯賽唔單止以1:2反輸畀切爾達，一對中堅馬菲奧同列卡度哥斯達仲齊齊傷出，加埋防中班尼加又養緊傷，中後場穿晒大窿喎！雙方喺首回合打成1:1，華倫要到完場前先憑普斯迪加嘅入波扳平，主場都踢得咁辛苦，今晚次回合去到馬體會地頭，隨時輸鑊勁都似！
Data King馬體會主場未輸過

馬德里體育會今季主場15戰錄13勝2和。

雙方近5次喺卡達朗球場交手大細單跳。

華倫近8仗有7場開半場細。
首回合：馬客和1:1