馬房秘聞:川滙主帥操勇搏殺

不死鸟

 

▲「川滙主帥」上仗跑千四搏失只獲亞軍，賽後胡森罕有地黑面，幸好馬主收貨，今次肯再畀機會潘頓。呢匹馬近期下午多由副練曾超祺加課，而胡森噚日收工前亦親自餵呂宋草，重視之情不言而喻，今仗必求補中。

▲「高駿」勝後連仗表現失準，今次何良一早已經向蘇保羅借用梁家俊，希望減磅較多可以幫到呢隻馬。噚朝何良更叫咗梁家俊入馬房寫字樓，翻睇此駒近仗錄影帶，並講解馬匹特性，而黎海榮亦在旁教路，然後三人齊齊入馬房睇馬匹食料情況，幕後動態咁積極，今仗必動食指。

威旺寶寶頻教閘

▲「威旺寶寶」上仗轉摩廐初出，慢閘下仍能夠跑第三，表現唔錯。近期大摩對症下藥，安排呢隻馬下晝響馬房外教閘。今仗增程跑二千米，馬房信心好強，認為只要唔再慢閘，有力憑後勁將對手一網成擒。

▲「稻庭烏冬」日前早已經釘好蹄鐵，但由於馬匹經過硬料催谷火氣太盛，排位朝響馬格內打腳，令蹄鐵都有少少移位，所以噚日馬房要安排加釘。呢隻馬上仗臨場有汗濕，告仔近日均安排呢隻馬下午游水後由助手騎踱遊花園，等佢情緒冇咁緊張，自然有機會打開勝利之門。