世界漫遊:吉祥三寶增程起筷

不死鸟

 歐洲本年度馬季首場一級賽根利錦標，響禮拜日順利完成，上仗於二級賽夏葛特錦標慘敗嘅「萬千景象」，響曼迪沙寶胯下重振雄風，以不足一馬位之先攻下呢場路程為二千一百米嘅草地大賽。

        上回響夏葛特錦標以三個多馬位不敵「駿馬畫家」「萬千景象」，今仗增程發展即重現法國打呲冠軍嘅霸氣，雖然響慢步速之下一度陷於困境，但一望空即以凌厲衝刺突圍而出，力壓多匹對手打開今季勝門。

        賽後練馬師利寶德話一度擔心過「萬千景象」會因受困而斷送爭勝機會，好在呢隻馬爆發力驚人，最終都交出理想表現。佢仲話睇過今場嘅驚險場面，以後會盡可能安排「萬千景象」出爭預期有快步速出現嘅賽事，而遲啲響英國皇家雅士谷賽期上演嘅重頭戲威爾斯親王錦標，預計到時就會有合適嘅步速，所以將會係呢隻馬下個目標。

       至於響根利錦標跑獲亞軍嘅「路博通」，訓練佢喺黎祿殊就話輸得心服口服，下仗此駒應該留番響法國出戰伊斯巴翰錦標，唔會好似舊年咁轉戰英倫。至於由巫斯義執韁嘅「紅莓果」，只響根利錦標跑入第五名。

        講番本地賽事，同屬法國出品嘅「吉祥三寶」終於響上仗首度入位，今次續配冼毅力增程跑二千米，可望打開勝門。