曼城-2冇有怕

猪拉多纳

死過翻生 搵布力般練靶

曼城於英格蘭足總盃第三圈（64強）重賽主場迎戰英冠球隊布力般流浪，呢間富豪球會本季喺各項賽事轟入94球，強大火力令人聞風喪膽，今場仲有王牌前鋒阿古路復出候命，未踢都嚇死人！英冠球隊布力般流浪上次放虎歸山，今戰作客等炒，曼城「-2」照捧讓球主勝！

（now 621及635周四凌晨4時10分直播）

曼城愈踢愈堅，計埋上場作客兩蛋贈紐卡素，本季四線作戰喪入94球，已經多過上季總入球數字一粒。大佬，家陣一月咋！踢咗半季多啲就打破去季紀錄，誇張到爆！早前曼城射手阿古路養傷，教頭比歷連尼改用尼格度同迪斯高合組雙塔攻堅，打落一樣咁勁，前仗6比0大炒韋斯咸，兩條友包辦五個士哥，問你點頂！

迪斯高現時有傷在身，今戰未必踢得，不過，阿古路終於好番晒，呢位阿根廷超級射手預期會先任後備，今仗前鋒線繼續用住尼格度先囉，橫掂呢隻「野獸」近期腳風順到癲，少個人爭食可能仲好。雖然進攻中場拿斯尼上仗受傷離場，證實要抖八周，中場耶耶托尼、魯迪維爾同箭頭祖維迪等都要養傷，但今場只係對住布力般，點計都夠殺啦。
布軍作客難偷雞

布力般流浪上次主場對曼城打出超水準，可惜尾段未能藉多打一人優勢贏埋，今次要於客場偷雞難過登天！布力般新箭頭基斯泰迪近期屢建奇功，賽前佢勁多口水：「個個認為布力般會輸0比5，但我哋毫無壓力，完全未驚過！」講真，曼城今季國內主場賽事全勝，連熱刺、曼聯同阿仙奴都被大炒，布力般大敗有幾奇喎！