雙鋒着火里昂馬賽大鬥法

猪拉多纳

今晚法聯盃8強爆發褪色大戰，昔日班霸里昂主場硬撼死對頭馬賽。正所謂仇人見面分外眼紅，佢哋每次碰頭都火花四濺，加上雙方王牌前鋒巴菲迪比高美斯及基格納腳風順到冇朋友，隨時合演一場大龍鳳，與其估邊隊贏咁傷腦筋，轉玩入球大更佳。

（周四凌晨3時55分開賽）

昔日法甲七連冠嘅里昂，因財困已不復當年勇，不過最近前法國國腳哥古夫傷愈復出，令進攻組織有所改善，加上箭頭巴菲迪比高美斯去夏扭計走人不成後，已修心養性逐漸上番力，呢隻「野獸」近七仗入咗六球，腳風勁順，帶領里昂走出谷底。
馬賽三叉戟煞食

另一邊廂，馬賽已冇晒歐戰負擔，下半季可專心國內比賽，除咗爭取來屆歐聯入場券之外，亦希望有盃捧，法聯盃就成為佢哋嘅目標，適逢基格納狀態弗爆，拍住泰奧雲及皮耶嘅三叉戟非常煞食，加上近年作客里昂曾出現5比5、2比2、3比2等大波膽，呢類宿敵激戰一向勝負難料，斯維寧願轉捧入球大。