拿玻里大炒冇「蘭」度

猪拉多纳

執掂防線愈踢愈好

拿玻里上半季大踢性感足球，場場入得又失得，估唔到經過聖誕假期後，教頭賓尼迪斯連防線都執掂埋，2014年兩戰都清脆淨勝對手，翼鋒梅頓斯更加大爆發，今晚喺意大利盃16強遇着作客例牌腳軟嘅阿特蘭大，1.8倍「讓主」係不二之選！

（now633及660台周四凌晨4:00直播）
阿特蘭大作客例腳軟

拿玻里中場比哈美最近就腳傷治療方式同球會出現拗撬，球員堅持做手術，球會則希望採用保守治療，好在比哈美喺星期一前往巴塞隆拿檢查後，態度有所軟化，話願意以避免做手術為前提接受醫治。

其實好難怪比哈美想盡快醫好腳傷嘅，拿玻里喺歇冬前成個12月3勝2和冇輸過，合共攻入14球失咗8球，踏入新一年更愈戰愈勇，接連砌低森多利亞同維羅納，兩場夾埋豪取5球，保持強大進攻火力外，最抵讚係佢哋1球不失，當中翼鋒梅頓斯就射入3球，箭頭希古恩交出2個助攻，瑞士孖寶迪斯馬利同恩拿喺中場穩打穩紮，比哈美再遲啲復出嘅話，容乜易冇碇企呀！

阿特蘭大日前雖然喺主場擊敗卡坦尼亞，結束聯賽6場不勝走勢，可惜佢哋作客勁曳，今季10戰輸足8場，最近嗰場鬥表現走晒樣嘅AC米蘭都淨吞3蛋，至於以7球成為首席射手嘅丹尼斯，作客例牌冇貨交，近7場僅得1球進帳，今晚想唔做炮灰都幾難咯。