巴塞三箭頭做「大」騷

猪拉多纳

基達菲落後4粒焗攻唔識死

巴塞隆拿呢類主攻型球隊，最驚就係對手唔攻啫，今晚佢哋喺西班牙盃16強次回合造訪基達菲，對手唔識死話要展開絕地反擊，收復首回合狂吞4蛋嘅失地喎，相信以柏度洛迪古斯、法比加斯同阿歷斯山齊士組成嘅三叉戟，肯定可以繼首回合之後再贏多鑊勁，橫掂「讓客」冇乜肉食，不如捧中位數3.5球嘅1.88倍入球大好過。

（now632台周五清晨5:00直播）

首回合巴塞憑法比仔同美斯各省兩粒，主場大炒基達菲4:0，相信今場波都唔會有咩差池，預期教練馬天奴會將「球王」美斯同埋尼馬收起，搵番柏度洛迪古斯、法比仔同A山合組三箭頭，中場就派番首回合有唔錯表現嘅「新沙維」沙治羅拔圖落場，就算唔係「夫添」應戰，中前場都夠晒睇頭。
兩隊近5次交手鋪鋪開大

基達菲落後緊4粒，幾可肯定晉級無望，不過教練路爾斯加西亞賽前話唔會扯白旗，今仗會藉主場之利向「地上最強」發動狂轟猛炸，力求收復失地創造奇迹喎！基達菲一對攻擊孖寶柏度李安同阿祖安哥倫加都係好波之人，要撕破由賓度把關嘅大門唔係冇機，弊在呢班波近4場波勁失13球，中後場球員好似桑華利拿同柏度莫斯基拉又養緊傷，豁出去喪攻隨時輸得仲大鑊過首回合。

再睇埋往績，雙方近5次交手鋪鋪開大之餘，總入球最少嗰兩次都起碼有4球，今場博入球大仲好過玩「讓球客勝」囉！
首回合：基客負0:4