阿仙奴重炮轟爆富咸

猪拉多纳

倫敦打吡專恰弱旅

阿仙奴爭做倫敦打吡之王，主場鬥富咸殺無赦！「兵工廠」阿仙奴8年無冠慘被同市大敵車路士騎住，今季強勢復甦不單想贏英超，仲要拎返倫敦一哥招牌！佢哋今季對住同市次級球會最少贏兩粒，今仗為保榜首席位，主場肯定發炮狂轟，絕對唔會放過富咸，蘇豪推介讓球主勝！

（now 621周六晚11時直播）
攻力強勁 唔怕傷兵多

今季英超6支倫敦球會打開兩截，阿仙奴、車路士同熱刺位處前列，富咸、韋斯咸及水晶宮齊齊護級。「兵工廠」聯賽5戰同市球會錄得4勝1和，遇上同級球會熱刺同車路士1勝1和，作客3支下游球隊則獲得全勝，而且場場都贏兩粒。今季英超咬得緊，阿仙奴主帥雲格深知鬥弱旅不容有失，一定唔會放生同市弱旅。

睇完數據睇軍情，家陣阿仙奴傷兵問題仍然嚴重，中場路斯基同左閘蒙利尼雙雙加入十字軍，連同中鋒賓特拿、箭頭禾確特、中場戴亞比、艾朗藍斯、阿迪達及中堅華美倫齊齊休戰。不過，雲帥擁有強大後備力量，小將阿歷士張伯倫同基拿比都可負責右路側擊，前線由奧斯爾、基奧特同辛迪卡索拉合作攻堅，火力仍然強大，主場出擊，對住下游球隊綽綽有餘。
連場大敗 預咗做炮灰

富咸上個月頭由前曼聯助教梅倫史甸領軍，現時水準勁唔穩定，梅帥帶咗8場聯賽錄得3勝5負，而且幾場輸波都慘被對手大炒，面對曼城同愛華頓大敗可以理解，但作客侯城吞6蛋同上周主場對新特蘭輸1比4就好難令人接受。富咸依家兵源有限，相信今仗作客預咗做炮灰，受讓一樣冇運行。
阿仙奴今季英超倫敦打吡戰果

日期 賽果

26/12/2013 客勝韋斯咸3:1

24/12/2013 主和車路士0:0

26/10/2013 客勝水晶宮2:0

01/09/2013 主勝熱刺1:0

24/08/2013 客勝富咸3:1