祖記紀錄後遺症寧吼細

猪拉多纳

意甲水準日益下降係不爭事實，最令球迷失望係今季連爭標懸念都冇埋，榜首祖雲達斯一枝獨秀，領先次席羅馬8分，冠軍獎盃基本上已成其囊中之物。恐怕連祖記自己都冇心機再搏殺，尤其係上仗創下聯賽11連勝紀錄後，球員隨時有所鬆懈，今晚主場對森多利亞，未必再大炒，主W冇肉食，讓球主客和讓兩球太過火，建議揀2.45倍入球細。

祖記聯賽連贏11場，刷新球會紀錄，包括大炒羅馬3蛋，今仗受一面倒睇好，的確無可厚非。不過要提防「紀錄後遺症」，例如羅馬創下意甲開季10連勝紀錄後，一度大幅回吐，連續4場失分。祖記完成壯舉後，隨時反高潮，即使繼續贏，好可能小勝收工，畢竟已甩開對手太遠，爭勝決心難免下降。另外，祖雲達斯將於下周中意大利盃8強硬撼羅馬，球隊歐聯出局，自然想囊括本土錦標補數。既然聯賽已佔絕對優勢，今仗或會留力，準備下周中作客羅馬。
森多利亞死守少大敗

森多利亞今季鬥強隊幾乎全敗，但多數小負1球，包括首循環0比1不敵祖記，作客AC米蘭及拿玻里分別輸0比1及0比2，早前意大利盃到訪羅馬亦僅敗0比1，皆因球隊有自知之明，唔會同勁旅火併，而係主守打反擊。今仗對手係祖雲達斯，預計森多利亞會屯重兵死守，博攞1分已達標。