祖記超班讓兩球唔嫌「多」

猪拉多纳

祖雲達斯堂堂意甲兩連霸王者，雖然要淪落到降格踢歐霸盃，但佢哋喺聯賽嘅「山寨王」本色亦唔到你唔服，喺榜首遙遙領先外，主場9戰全勝更堪稱無敵，今晚主場迎戰質素存在明顯差距兼夾陣容不整嘅森多利亞，辣讓兩球照捧2.25倍「讓球主勝」！

（TVB301周日凌晨3:45直播）

「斑馬兵團」自從舊年10月中不敵費倫天拿後，喺聯賽再冇輸過不特止，更正值11連勝銳勢，其中「二哥」羅馬同「三哥」拿玻里到訪都要捧住3蛋返歸。再者祖雲達斯近期愈戰愈勇，班球員勒都勒唔住，近5戰每場最少攻入對手3球，好似洛蘭迪、泰維斯、維達爾等猛將全部蓄勢待發，就算有意盃8強作客羅馬呢個後顧之憂，今晚挾住主場全勝佳績落場，正好怒炒對手壯行色！
森多核心基斯迪錫停賽

相對祖記慨贈羅馬同拿玻里3蛋，對手森多利亞則恰巧喺今個月接連輸晒畀呢兩支聯賽前列分子，雖然開講有話波係逐場計啫，但森多球員質素較差係鐵一般事實，今戰中場核心基斯迪錫又要坐波監，除咗嚴重削弱球隊組織能力，前線過分倚重艾達馬田斯亦係致命傷，佢哋最近所入嘅7球，其中5球都係由呢名巴西射手取得，今晚要喺近6戰主場冇失波嘅祖記防線面前取得甜頭，怕且好難咯。
祖記意甲主勝率100%：Data King

‧祖雲達斯今季意甲主場9戰全勝。

‧「斑馬兵團」近6戰聯賽主場攻入17球而不失1球。

‧祖記聯賽主場開出7次「半場勝」及2次「半場和」。