巴塞半場細啱數

猪拉多纳

尼馬拗柴進攻頭雲

今晚西甲榜首嘅巴塞隆拿作客硬撼利雲特，雖然巴塞王牌美斯傷愈後逐漸上力，可惜好拍檔尼馬喺上周中盃賽嚴重扭傷，要抖三至四周，遇啱利雲特前線亦唔齊腳，今仗會更加專注防守，隨時搞到巴塞老鼠拉龜冇碇埋手，初段唔慌多波入，半場細不容錯過。

（now 632周一凌晨2時直播）

上周中西班牙盃16強次回合巴塞靠美斯梅開二度，作客輕取基達菲兩粒，證明呢位球王狀態復甦，不過其拍檔尼馬右腳足踝嚴傷扭傷，官方宣布佢要抖三至四周，加上出擊力強嘅右閘丹尼爾要坐波監，冇咗兩位巴西球星壓陣，點都對攻力有影響。

利雲特一向係豬頭骨，近兩仗贏晒兼一球不失，包括剛於西班牙盃擊敗華歷簡奴晉級，士氣大振。不過連續兩仗一箭定江山嘅前鋒巴華，因儲夠五張黃牌，今仗需要停賽，另一前鋒巴巴迪亞華拉亦上陣成疑，連兩個進攻支點都冇埋，主帥卡柏路斯勢必屯重兵於中後場，疊埋心水叫班手下做好防務。
利雲特主場硬淨

睇番「小蝙蝠」今季9仗主場聯賽只失9粒，踢法硬淨到暈，只要佢哋立心死守，等閒球隊好難攻破其城池，強如皇馬作客利雲特上半場都係互交白卷，更何況攻力受削嘅巴塞呢？利雲特初段好氣好力做防守，「地上最強」未必咬得入佢哋，半場細有1.85倍咪嫌少。