攻守都贏晒車仔撞散紅魔

猪拉多纳

英超上演「車曼大戰」，「寸王」贏多一場就可以成為英超「百勝教頭」，如果喺呢個特別日子砌低「紅魔鬼」，意義肯定更重大，況且佢件愛將夏薩特近期Fit到漏油，對住甩皮甩骨兼由「反派小三」莫耶斯領軍嘅曼聯可以秤先，車路士讓半一捧上盤。

（now621台周一凌晨0:00直播）

車路士呢期破紀錄破到唔識停，繼門將施治上星期以209場清白身，打破球會名宿、外號「飛貓」嘅邦納迪嘅不失球場數紀錄後，今晚就輪到莫連奴「騷哥利」。「寸王」帶領車路士征戰英超141場贏足99場，今晚只要搞掂埋曼聯，就會成為英超「百勝教頭」，賽前「Special One」貫徹牙擦作風，話明「今場就要達標」。
莫耶斯訪Big4未贏過

查實莫帥咁有信心又唔係冇道理嘅，因為車仔最弱嗰環防中位置問題已經解決咗，以2,100萬鎊由賓菲加回巢嘅尼曼查馬迪，賽前話自己夠狀態可以擔正，有呢位去季葡超MVP同拉美利斯做「掃把佬」，曼聯班攻擊球員肯定冇啖好食。「藍戰士」近期連贏4場聯賽，就連費托都鹹魚翻生，連續兩輪英超有波入，最重要係中場夏薩特狀態大勇，單係對上8仗，就貢獻咗5球同3次助攻，統計網站Opta更顯示，佢今季為隊友製造咗冠絕英超嘅50次埋門機會，問你怕未！

咁點解莫耶斯係「反派」呢？皆因每次遇上大戰都要反佢嘛！呢條蘇格蘭佬喺英超時代46次帶隊造訪傳統Big4（曼聯、車路士、利物浦、阿仙奴）都未贏過，當中12次去到史丹福橋只得6和6負，點睇都唔似係「寸王」對手！係，落場嘅係球員唔係領隊，但曼聯最做得嘢嗰位朗尼，喺英國時間禮拜四由埃及歸隊後，軍醫仲係對佢嘅鼠蹊傷勢唔樂觀，《衞報》仲話「魔童」要抖多3周，另一件射手尹佩斯同左閘艾拉又分別因大腿同膝傷缺陣，攻守兩瓣都唔掂，點計都係車仔高啲啦！
乜都玩錦囊： 跟往績博半場0:0

車路士今季表現慢熱，往往都喺下半場先至嚟料，就講近3場吖，即使對手只係修咸頓、打比郡同侯城，「藍戰士」都係要去到下半場先打破僵局。睇埋往績，對上3次「車曼大戰」都係半場窿窿，2.1倍半和同2.45倍半場0:0波膽都玩得過。
Data King：曼聯砌車例食白果

‧曼聯近3次對車路士都入唔到波。

‧雙方近4次喺史丹福橋交手產生咗5個12碼。

‧車路士近5次鬥曼聯錄2勝3和。