西布朗大傷「鋒」 拖肥客勝咪嫌熱

猪拉多纳

山楂具有健脾開胃嘅效用，不過西布朗今晚喺山楂球場迎戰愛華頓，現時陣中狀況剛好同山楂效用相反，箭頭沙恩朗賽前投奔侯城不特止，安歷卡最近被贊助商下令封殺，前線人腳捉襟見肘，睇嚟難阻要搶分爭取歐聯入場券嘅「拖肥糖」贏波，一於撐2.03倍客勝。

（now621台周二凌晨4:00直播）

法國射手安歷卡上月底喺聯賽做出疑似「納粹」手勢，事件搞到滿城風雨，至今事隔半個月有多，但仍然冇解決迹象，英格蘭足總強調已聘請專家幫手調查，反歧視團體Kick It Out則嫌進度緩慢及欠缺透明度向足總施壓，至於最新鮮滾熱辣嘅消息，則係波衫心口贊助商Zoopla揚言今晚見到安歷卡落場嘅話，將會即時終止贊助合約咁話。
迪斯甸復出無後顧之憂

雖然唔知西布朗係咪會同「錢」途對着幹，但實情安歷卡自從「納粹風波」發生後啞晒火，落到場都未必幫到手。至於喺西布朗孭飛多年嘅愛爾蘭國腳沙恩朗，賽前落實投奔侯城，安尼捷比同施斯隆又話要抖，前線倚靠馬迪維達同比拉希奴兩件生牯仔搵食，今戰處子登場嘅新帥梅爾，怕且幾難有個好開始。

愛華頓同西布朗一樣，賽前有箭頭謝拉域轉投侯城，好在該克羅地亞國腳今季已非必然主力，影響遠低於對手。就算英格蘭新星巴克里拇趾骨折避戰，但巴利、奧士文、米拿拉斯等中場悍將足夠彌補空缺外，被腿筋傷患纏擾三個星期嘅守將迪斯甸，今場能夠復出扼守中路，亦令防線更為穩固。

況且「拖肥糖」防線並非獨沽一味識得守，巴尼斯、史密斯高文同白賴仁奧維度喺今季聯賽合共貢獻10球，入球量媲美西布朗5名前鋒嘅總和，加埋前線有「小魔獸」盧卡古擔正數胡，今晚要撕破自後衞比利鍾斯眼傷避戰後，連續兩場都吞蛋輸波嘅西布朗，真係話都冇咁易！
Data King西布朗近11場聯賽僅1勝

雙方近6次對壘，愛華頓錄得4勝1和1負較佳成績。

西布朗近11場聯賽僅得1勝，其餘10場錄得5和5負。
乜都玩錦囊 半場波膽「0:0」博得過

西布朗陷入前鋒荒，愛華頓防線無後顧之憂，相信可以睇定嚟食，而「拖肥糖」今季每逢作客前半段慣性謹慎，今季10場有8場同對手「煎雙蛋」返入更衣室，今場不妨再追2.6倍「0:0」半場波膽。