黑仔紐倫堡前景淒涼

猪拉多纳

德甲重開禾夫斯堡來勢勁

經過逾兩個月歇冬後，德甲將於明晚重開，首仗即上演重頭戲，慕遜加柏主場鬥拜仁慕尼黑，經過歇冬後，列強人腳變動唔算大，矚目轉會只有一宗，禾夫斯堡以2,200歐元轉會費，由車路士購入比利時中場新星奇雲迪布尼。
冠軍無懸念 前4爭崩頭

班霸拜仁慕尼黑基於要參加世冠盃，首循環最後一輪作客對史特加之戰押後舉行，不過佢哋喺踢少一場嘅情況下已領先次席嘅利華古遜7分，加上兵源同質素上絕對優勢，聯賽冠軍幾成囊中物。下半季焦點只在於爭前4同護級，當中以前4名歐聯參賽資格爭持最激烈，除拜仁坐定粒六外，目前2至5名嘅利華古遜、慕遜加柏、多蒙特同禾夫斯堡，加上暫列第7位嘅史浩克04都有機會，多蒙特同史浩克上半季都因為傷兵問題影響成績，但兩軍目前傷情改善有限，下半季早段時間依然艱辛。

前景樂觀嘅球隊首推禾夫斯堡，歇冬前9場聯賽6勝3和保持不敗，體育總監K阿羅夫斯同新帥赫基合作產生良好化學作用，加上奇雲迪布尼來投，戰鬥力進一步提升，係下半季最值得注意球隊。
紐倫堡三大領袖齊重創

護級方面，榜尾兩軍布倫瑞克同紐倫堡都係降班膽，前者質素、兵源同經驗都不足，空有鬥志亦難捱到尾，至於紐倫堡今季最黑仔，係今季歐洲各大主要聯賽唯一未開齋球隊，雖然有鬥志，但防線唔合格，前線又射極唔入，上半季中楣中柱達到16次，經常佔優下贏唔到波。原本以為下半季有望否極泰來，點知歇冬期黑上加黑，經過4場熱身賽，陣中三大重心球員日本國家隊隊長中場長谷部誠、奧地利國家隊中堅普加迪斯同隊長守門員舒希化先後受重創，球隊又缺錢買人補充，前景淒涼，次循環首場聯賽對歇冬期埋頭苦幹嘅賀芬咸，開盤後可以買定對家！