莫連奴寸得嚟識保護球員

猪拉多纳

莫連奴上輪又再一次以出人意表的布陣取得勝利，上半場已入兩球的伊度奧，最終上演帽子戲法，幫助車路士得以3比1擊敗曼聯。這場勝利是莫帥於英超個人第100場勝仗，而且只用了142場比賽便完成，令他成為英超史上最快進入「百勝會」的領隊。

其實一開賽時，我在Now TV嘅Wechat同球迷傾偈，大家都對派出伊度奧而棄用費蘭度托利斯有保留，但伊度奧好快已用入球去證明寸王嘅布陣係正確。賽後莫連奴都對自己取得100場勝利冇講太多，並直言紅魔今季已無望奪冠，而且連爭前四都有問題，莫帥甚至願意將桑馬達賣給曼聯，都反映出紅魔再唔係車路士的主要對手。
莫耶斯冇料A字膊

其實我對莫耶斯確實不滿，絕對唔希望莫耶斯憑費Sir留低的班底，就可以輕易取勝。我記得今季莫耶斯上任不久已令球隊成績下滑，之後他竟然對傳媒話因為曼聯陣中沒有世界級球員。曼聯貴為冠軍球隊，陣中都是國腳及冠軍級人馬，莫耶斯新官上任就否定曼聯球員多年來的努力，我可以想像到尹佩斯、朗尼、查維亞靴南迪斯等聽到這段說話時是何等不滿。一名出色領隊應該好似費Sir令球員都打出120分水準，而不是將問題都推落球員身上。

其實保護球員方面，SPECIAL ONE（莫連奴）是專家，他將自己化成新聞焦點幫球員減壓，當球隊輸波時，寧願自己做無賴將責任放到球場、球證，但總不會將球員的問題公開討論，這就是球員都會愛的好領隊。今個星期車路士將於英格蘭足總盃對史篤城，我相信好的領隊才能令球隊取勝。

（now 621及635周日晚11時30分直播）