多蒙特回夠氣大炒格

猪拉多纳

德甲全面重開，首循環成績令人失望嘅多蒙特主場迎戰奧格斯堡，多蒙特今季噩運纏身，大批主力球員輪流受傷，嚴重影響成績，好在經過休戰期回氣，目前傷兵問題已有改善，球員休息後亦重拾朝氣，今晚主場迎戰實力較次對手，係時候重返勝軌兼攞彩，推介多蒙特讓球主勝。
近季恰死奧格斯堡

多蒙特去年尾傷兵滿營，根本排唔到一條似樣嘅防線，又要三線作戰，兵源短缺下搞到疲於奔命，歇冬前德甲主場三連敗，十分罕見，如今佢哋已跌落聯賽榜第四位，未計今日凌晨慕遜加柏對拜仁嘅結果，喺踢多一場之下落後拜仁十二分，高普承認想追拜仁係冇可能，多蒙特目標係亞軍，不過佢哋仍然落後次席嘅利華古遜五分，要後來居上，今晚主場不容有失。

好在傷兵問題已開始緩和，雖然仍有曉姆斯、蘇保迪同根度簡繼續養傷，但防線舒姆沙同施雲賓達都可以復出，球隊中前場人腳完整，近期熱身賽表現亦一仗比一仗好，今晚主場面對實力次一皮嘅奧格斯堡，雖然對手上半季表現同成績都較預期好，但近年往績畀多蒙特食住，多蒙特首循環作客都大勝四比○，今晚主場好有信心重響勝鼓，主場要贏兩球唔難。
有線61及201台直播