紅軍劏般尼茅夫賀哨牙蘇牛一

猪拉多纳

比鬥曼車付出多5倍動力

英格蘭足總盃第4圈（32強）今晚開戰，英超「阿四」利物浦會造訪般尼茅夫。咪以為「紅軍」對住隊「英冠仔」就會輕敵，實情佢哋上屆就係喺第4圈「賴嘢」，領隊羅渣士見過鬼怕黑，賽前講明會派遣「壽星仔」蘇亞雷斯同謝拉特等主將出擊，避免重蹈覆轍，對住今季有求必應嘅般尼茅夫防線，梗係捧1.84倍「讓客」啦！

（now621及635台周六晚8:45直播）

利物浦喺上屆足總盃第4圈懶叻，派副選球員出擊卒之以2:3輸畀奧咸出局，主帥羅渣士對呢單嘢耿耿於懷，賽前先係話「足總盃係球隊今季嘅目標之一」，又話「鬥般尼茅夫要比面對曼聯同車路士付出多5倍動力」，聽佢咁講，今仗唔似會輕敵喎！
般尼茅夫防守英冠第2差

查實利物浦家陣傷兵滿營，除咗右閘格連莊臣要無限期休戰之外，計落仲有丹尼爾艾格、荷西安歷基、馬馬度沙高同盧卡斯等一大堆傷兵，所以就算「紅軍」禮拜三凌晨要出戰「默西賽德郡打吡」，領隊羅渣士都冇乜本錢玩輪換。預計除咗澳洲門將巴利鍾斯、鋒將路爾斯阿拔圖同伊亞高艾斯巴斯幾位副選兵會擔正之外，隊長謝拉特同蘇亞雷斯兩大靈魂都會落場。

「哨牙蘇」尋日27歲牛一，今晚肯定想搵般尼茅夫「開餐」賀壽，呢位烏拉圭國腳今季已經入咗22球，以佢嘅過關斬將能力同罰球功力，般尼茅夫班後衞肯定有得震冇得瞓。

雖然話盃賽係爆冷溫床，但般尼茅夫呢支南岸球隊家陣喺英冠都自身難保，只係比尾三嗰隊唐卡士打多7分，加上以隊長湯美艾菲克為首嘅防線出名豆腐，今季26輪英冠賽事過後已經勁失45球，係聯賽第2差球隊，睇嚟今晚又係「哨牙蘇」嘅Show time。
Data King 利物浦對賽旺贏4:1

般尼茅夫係英冠失波第2多隊伍（45球）。

利物浦近3次「-1」都贏盤。

雙方對上4次喺足總盃交手，利物浦有兩次贏4:1。
乜都玩錦囊 紅軍慢熱玩埋和客

利物浦近期比較慢熱，近6場波只有1次係半場領先，當中上圈足總盃鬥奧咸都要到下半場先能夠打破僵局，般尼茅夫實力輸一截肯定唔會同「紅軍」鬥攻，預計利物浦下半場先會取得領先優勢，3.9倍「和客」玩得過。