歐塞爾主場不敗未受考驗

猪拉多纳

朗斯格食格平手秤先

今晚歐塞爾迎戰朗斯嘅法乙戲碼，前者主場不敗睇落堅挺，實情未接受過真正考驗，今輪迎戰「剋星」朗斯，翼鋒拿塔着火亦難單天保至尊，平手盤揀聯賽「3哥」朗斯啱數。

（開賽時間：周二凌晨3:30）
朗斯中堅復出一對射手勁弗

喺法乙排第13位嘅歐塞爾，今季主場10戰6勝4和未輸過，箭頭拿塔更連續4仗主場有進帳，唔使讓波睇落確係幾吸引。不過值得留意嘅係，佢哋喺呢10場波都冇鬥過聯賽三甲分子，今場首遇「三哥」朗斯，對手有中堅簡達里坐完波監復出鎮守中路，拿塔要延續入波強勢怕且唔易。

對手朗斯連同聯賽及法總作客4連勝不特止，無論主場抑或作客出戰，近4次鬥歐塞爾全部贏晒，格食格味濃。再者，朗斯雙箭頭弗到漏油，阿根廷箭頭查維理亞近兩場接連建功之外，首席射手杜斯加更係連續4場聯賽有波入，今場馬會開平手盤，仲唔撐等幾時？