防線甩皮甩骨紅軍難o趙拖肥

猪拉多纳

今晚英超矚目戲碼，點少得「默西賽德郡打吡」利物浦迎戰愛華頓，紅軍雖然有強勁嘅「SAS」前鋒組合，踏入21世紀後喺晏菲路更食住「拖肥糖」，弊在條防線殘破不堪，前面入埋隨時唔夠後面失，今場仲話辣讓半一，吼實愛華頓下盤啱數。

（now621台周三凌晨4:00直播）
愛華頓盧卡古

留力搏打吡

利物浦後防傷兵成籮，丹尼爾艾格、格連莊臣、荷西安歷基等養傷，馬馬度沙高今場亦未確定趕及復出，右閘無論由法拿根抑或馬田基利擔正，同埋高路托尼及史卡迪爾嘅中堅配搭，都難予人信心。況且紅軍日前足總盃鬥般尼茅夫，因傷員太多逼住強陣應戰，就算「英冠仔」嘅威脅有限，但距離今場波相隔短短3日，球員體力未必恢復得切。

相反日前喺足總盃輕鬆晉級嘅愛華頓，「小魔獸」盧卡古全程擔任後備，中堅菲臘積基爾卡踢咗半場後亦被換走，教頭馬天尼斯擺明留力搏今鋪。而上輪聯賽鬥西布朗腿筋受傷嘅右閘史密斯高文，今場復出機會唔細，令防線回復完整。雖然踏入21世紀後，「拖肥糖」14次到訪晏菲路都冇威過，僅得8和6負劣績，今場要打破不勝數據怕且難啲，但絕對有條件全身而退！