熱刺主場開大片

猪拉多纳

勇字當頭 搵曼城尋仇

英超進攻王曼城首循環主場6比0狂數熱刺，今次作客熱刺又點先？呢支富豪踏入2014年延續士哥狂潮，每場平均射入3.5球，射手阿古路現時處於恐怖狀態，要再破熱刺後防唔係難事。熱刺首循環雖然輸得肉酸，但當時仲係由保亞斯領軍，依家舒活逐漸執番順隊波，今場一為前四二為面子，實行心口掛住個「勇」字同曼城駁火，入球騷可期，捧大！

（now 621周四凌晨3時45分直播）
阿古路弗得好誇張

先同大家去返舊年11月24日，當時曼城主場對住熱刺開波1分鐘就由快翼捷西斯拿華斯打破缺口，熱刺兵敗如山倒淨吞6蛋，真係輸到慌，而呢場慘敗亦成為上任教頭保亞斯被炒其中一個原因。當日曼城全場射門小勝15比13，但最終比數超懸殊，反映兩軍前線把握力差距勁大。事實上，曼城本季聯賽有21.2%射門轉化成入波，比例為英超最高，一拍埋即時高下立見。

跟住睇近況，曼城上場足總盃對英冠仔屈福特半場Hea踢輸兩粒，換邊後踩行油即反勝4比2，射手阿古路連中三元係頭號功臣。佢哋擁有3位超級射手，查實迪斯高都好叻仔，即使另一中鋒尼格度有傷未必踢得，唔好唔記得仲有應屆非洲足球先生耶耶托尼一樣係球隊「士哥拿」，大軍火力強勁。曼城踏入2014年聯賽連盃賽踢過8場，共轟入28粒，場均入3.5球，誇張到爆，熱刺對住佢哋，即使有地利都好難保持不失。
艾迪巴約倒戈實搏

熱刺自舒活接手領軍後確係有進步，淨計聯賽5勝1和未輸過，當中包括作客砌低曼聯，戰績都幾硬淨，尤其艾迪巴約解凍後交足貨，仲激活埋隊中其他球員，呢位射手本身係有卡士，今次倒戈曼城會更加二錢肉緊，而依家聯賽前4爭崩頭，熱刺失分空間唔多，加上復仇心切好向主場粉絲交代，即使對住咁勁嘅曼城亦要鬥攻，曼城防線近期不時有甩漏，熱刺雖冇贏波把握，但斷估唔會捧蛋。

翻查往績，兩隊對上5次交手全部開大，曼城仲試過作客熱刺大勝5比1，當日就有迪斯高食出大四喜，佢對白鹿徑球場熟晒路，堪稱合埋眼都識入波，今場追大着數！