拿玻里冇讓波元素

猪拉多纳

意大利盃最後一場8強賽事，拿玻里主場對拉素，「藍鷹」拉素自月初請利查回巢執教後5戰保持不敗，呢位68歲老帥當年一手將拿玻里由丙組帶上意甲，屬於球迷心目中嘅大英雄，但4年前被拿玻里無情炒魷，今仗勢必還以顏色，主場擁躉隨時倒戈為佢打氣。拿玻里近期跌Watt，防線頻出甩漏，讓唔起穩打穩紮嘅拉素，力捧讓球客勝。

（now 633及660周四凌晨3時45分直播）
拉素老帥利查「光榮」倒戈

利查05年執教當時仍然係丙組仔嘅拿玻里，僅用兩年時間就打上意甲，之後更取得歐洲賽資格，屬於拿玻里復興最大功臣。不過4年前成績稍為倒退，即被炒魷，當時好多拿玻里球迷及傳媒都戥佢唔抵，重返故地，應會大受歡迎，而非噓聲。事實上，利查係有料之人，執教拉素一樣有聲有色，月初回巢後領軍5戰取得3勝2和，包括上仗打和祖雲達斯，演出非常硬淨，今仗受讓好抵玩。拉素係上屆意大利盃冠軍，身負衞冕重任，肯定額外落力，贏埋都唔奇。

拿玻里表現走晒樣，近兩仗對住聯賽下游球隊博洛尼亞及基爾禾都贏唔到，而且同樣先失波，進攻主將希古恩、咸錫腳頭無靈，冇晒上半季嘅霸氣，教練賓尼迪斯要花時間諗計重振軍心。另外，拿玻里首要目標始終係下屆歐聯入場券，對本地盃仔興趣唔大，讓波寧捧對家。