曼城雙刺客 反轉白鹿徑

猪拉多纳

想報仇？冇咁易！上年11月狂吞曼城6蛋嘅熱刺，今晚回師白鹿徑球場恭候「藍月亮」，當然想食住近期勇態報番慘敗之仇。講就容易，曼城一對鋒將阿古路同迪斯高堪稱「刺客雙雄」，對住熱刺零舍鍾意數胡，加埋佢哋剛啱喺足總盃上咗寶貴一課，今鋪實打醒十二分精神，作客小讓平半上盤捧得過。

（now621台周四凌晨3:45直播）

曼城上周六喺「無敵主場」出擊嚇人一跳，半場唔夠竟然落後畀「英冠仔」屈福特兩粒，好在最尾反勝4:2晉級，過程係就係驚險，但亦都印證只要「藍月亮」一撳掣，威力真係唔講得笑。領隊比歷連尼話球隊上咗寶貴一課，唔會再輕敵，又憶述當時嬲到想換走晒11名球員，一眾戰將見過鬼怕黑，今晚仲唔醒醒定定咩！
阿古路復出2場入4粒

鬥屈福特場波連中三元嘅阿古路，復出2場已經入咗4球，歷嚟4鬥熱刺亦都有4球進帳，佢今晚個前線拍檔迪斯高亦同樣專恰熱刺，過去5次對呢支倫敦球隊入咗5球。有「刺客雙雄」衝鋒陷陣，首循環都隊得入6粒，今鋪作客打過半價都有3粒啦！《每日郵報》前晚仲話，喺聯賽盃4強整傷膊頭嘅尼格度已經復操，加埋祖維迪又慢慢搵番狀態，迪斯高難得仲有機會喺聯賽擔正，仲唔搏命省多兩粒取悅比帥咩！
熱刺反彈未受考驗

冇錯，熱刺自從舒活上任後脫胎換骨，坐正後喺英超領軍5戰更獲4勝1和佳績，艾迪巴約重返正選更已攻入6球，球隊首循環大敗、「多哥王子」又係曼城棄將，照計肯定想搵曼城出氣。之不過熱刺近期勝仗只係嚟自史雲斯、水晶宮、史篤城同今非昔比嘅曼聯，老實講舒活仲未受過真正考驗。有睇上場熱刺贏史雲斯嘅球迷，都見到迪比利同艾朗連儂嘥咗幾多「餐士」，對住「天鵝」就有大把機會啫，把握力咁曳好難喺曼城身上攞着數，今晚有地利都唔樂觀。
茅柴熱刺19位球員攞過牌

曼城今季聯賽有21.2%攻門變成入球，入球率冠絕英超。

雙方近7次喺英超交手曼城錄5勝1和1負。

熱刺今季總共有19位球員食過黃牌，茅盡英超。
熱刺撼火力王「大」無畏

曼城係英超「火力王」，場均隊兩粒真係最低消費，不過熱刺同艾迪巴約一心復仇，近6次喺白鹿徑恭候曼城亦只得1次食白果，一於捧1.52倍大剝住花生等睇入球騷。