有錢佬Vs更有錢佬

猪拉多纳

今日我要講個故事畀大家聽，從前有個非常有錢嘅小朋友，佢由俄羅斯搬到英格蘭生活，之後發現身邊嘅大人，都有好多好靚又好玩嘅玩具，佢諗都唔諗，由銀包度拎咗一大舊錢出嚟，買晒佢鍾意嘅玩具返嚟，而且令玩具店將玩具價格大幅度調升。最後，好多大人都因為冇錢買玩具，甚至要變賣自己心愛嘅玩具畀呢位俄羅斯小朋友，最後得番一些舊玩具玩。雖然仲有幾位富豪都可以同呢位小朋友爭玩具，但大家都埋怨佢破壞晒規矩。
玩具有感情 慢慢懂珍惜

隨着年紀愈來愈大，俄羅斯小朋友發現唔可以不計代價咁同人爭玩具，因為真正識玩嘅都係慢慢玩，同Toy story 一樣，其實玩具係有感情，你對佢好，佢對你更好。佢慢慢學識珍惜玩具，最後終於完成心願，佢嘅玩具成為歐洲最強，但同時間又出現咗一位比俄羅斯人更有錢嘅小朋友，直情好似當錢唔係錢，年年都買一大批玩具又唔用，氣燄比當年俄羅斯小朋友更甚。

就好似童話故事一樣，俄羅斯人為咗證明自己先係最強玩家，佢唔再盲目地亂買一番，今次佢搵番「最特別的人」，去幫佢帶領一班舊玩具，好似林柏特、泰利、施治等去跟來自石油國嘅富豪決戰。究竟係成長了、明白金錢之外更要有感情嘅俄羅斯人強，還是金錢至上嘅新富豪更勝一籌呢？留意下周二凌晨曼城主場對車路士就有答案。

（now 621周二凌晨4時直播）