阿爾克馬爾受讓有作維

猪拉多纳

今個周中荷甲開快車，周三凌晨率先上演三場賽事，直播戲碼有維迪斯主場鬥阿爾克馬爾。奇兵維迪斯實力曝光後踢來縛手縛腳，發揮遠在水準以下，今戰對向來遇強愈強嘅阿爾克馬爾唔易啃，波童捧讓球客勝。

（now 670周三凌晨3時45分直播）
維迪斯露餡難破鐵桶

有留意荷甲推介嘅讀者應該記得波童今季唔只一次大讚維迪斯，其中對由車路士外借嘅巴西中場盧卡斯皮亞桑更推崇備至，可惜佢哋對上兩場聯賽發揮失準，作客飛燕諾失分尚可原諒，但之前主場對護級分子奈梅亨被逼和就令好多捧場客失望。經過上半季神勇演出，唔少球隊已經唔敢輕視維迪斯，由於佢哋前線始終欠缺一名衝撞型射手，一旦遇上對方死守或者有級數嘅防線，要撕破密集並唔容易。

阿爾克馬爾歇冬後連盃賽四戰贏三場，當中三場贏波都冇失波，無論攻守都有一定板斧。論個人質素，佢哋唔會輸蝕畀維迪斯，而且翻查往績，阿爾克馬爾對上八次於聯賽面對維迪斯未嘗一敗，踢法有格食格味道，今次受讓值得捧場。