首都打吡捧馬體會

猪拉多纳

C朗中金球獎魔咒

今晚深夜西盃4強首回合頭場上演首都打吡，皇家馬德里主場迎戰死敵馬德里體育會。踏入新正頭，「銀河艦隊」皇馬就喺聯賽失分兼有Ｃ朗被逐，相反馬體會升上榜首，雙方運勢此起彼落，正所謂寧買當頭起，馬體會受讓半一，真係有買趁早呀！

（now 632周四凌晨3時直播）

踢波嘅嘢有時好邪，皇馬巨星Ｃ朗攞金球獎之前，場均入1.2球弗到震，點知攞完獎後6仗只入3粒，場均入得0.5球跌晒Watt，上仗作客畢爾包更出手摑人做「紅牌阿姑」，累球隊和波失分，雖然佢喺西盃唔使停賽，但烏雲蓋頂信唔過。
施蒙尼揮軍皇馬冇失拖

相反馬體會就唔同喇，踏入新正頭即大勝皇家蘇斯達，趁住巴塞失分，事隔18年後再次登上聯賽榜首，儘管有前鋒韋拿受傷，不過好拍檔迪亞高哥斯達重拾射門鞋，舊將迪亞高啱啱回巢亦極速融入，有埋呢位腳法細膩嘅巴西中場派牌，令到馬體會攻力更上一層樓，加上基比及佐治高基等呢班爛打中場，皇馬嘅少爺兵真係冇咩甜頭可言，而且主帥施蒙尼自兩年前接手後，兩次作客巴拿貝球場都未輸過，有得受讓半一實在筍到暈，呢個下盤咪錯過。