車仔着火追撞紐卡素

猪拉多纳

今晚車路士主場對紐卡素係大炒格，車仔作客都可以擊敗曼城，點計紐卡素都唔係曼城嗰波，今仗車仔仲有主場之利，怎有不勝之理？車仔上仗盡展現冠軍相，勢必乘勝追擊力逼榜首阿仙奴。「喜鵲」中場靈魂卡比耶離隊後，整體實力「降呢」，更何況仲有首席射手雷米繼續停賽，去到史丹福橋球場比賽，猶如螳臂擋車，隨時被大炒，Mic少直取讓球主勝。

車路士近9場聯賽取得7勝2和，包括擊敗利物浦及曼市雙雄，表現極具說服力，特別係上仗打破曼城今季英超主場全勝走勢，證明車仔領隊莫連奴已經搵番「贏波方程式」，擊敗曼城後燃起球員鬥志，狀態亦處於最巔峰時期。車路士現時僅落後阿仙奴兩分，隨時可以反超前對方，最緊要做好自己，繼續每場全取3分，以車仔今季聯賽主場12戰10勝2和強勢，足以輕取紐卡素。
卡比耶離隊 喜鵲失重心

紐卡素近期狀態低迷，包括盃賽在內，近7仗僅1勝1和5負。卡比耶早前轉投巴黎聖日耳門後，「喜鵲」頓失重心，上仗「東北打吡」主場慘吞死敵新特蘭3蛋，嚴重打擊士氣，而且仲充分反映冇咗呢位中場，紐卡素同護級分子無異。

紐卡素首席射手雷米繼續停賽，其他前鋒如艾美奧比、森美艾美奧比、柏比斯施斯今季腳頭無靈，無法代替雷米嘅作用。快翼賓艾化雖然腳法細膩，但太過獨食，令進攻效率往往打折扣。紐軍後防亦唔見穩陣，今仗遇上勁旅車路士，紐卡素輸少當贏。