漢堡狂o趙哈化柏林

猪拉多纳

唔想做降班罪人

今日小弟同大家玩個冇獎問答遊戲，究竟邊隊係德甲史上唯一一支未降過班嘅球隊？正路梗係會答拜仁慕尼黑或者多蒙特啦，但原來真正咁威水嘅係漢堡喎！一直喺最高級別聯賽打拚嘅漢堡，梗係唔想今年「破紀錄」啦，佢哋今晚會喺主場對哈化柏林，雖然近況唔掂，不過教練雲馬維克賽前講明為咗保住球會塊金漆招牌，嚟緊場場波都要當決賽咁踢！唔使審戰意肯定爆晒燈，今場一於博漢堡主場反彈，開主win！

（有線61、64、201及203周日凌晨1:30直播）
唯一未降過班球隊

漢堡歇冬後連輸兩場，每場輸0:3，啃咗6隻蛋滯到嘔，依家已經跌到落聯賽榜尾二！好彩睇分數佢哋距離護級區仲只係差1分，甚至同第13位嘅史特加都只係相差3分，形勢絕對唔係想像中咁惡劣。何況「凱撒大帝」碧根鮑華都開口撐，話德國球壇一定唔可以畀漢堡降落乙組咁話。小弟雖然唔知「大帝」有乜法寶，但就可以想像得到，若果漢堡真係降班，所造成嘅震撼將會幾咁大！班球員唔想做歷史罪人，梗係要盡快振作啦！

其實作客嘅哈化柏林都係麻麻地，冬休返嚟之後咪又係兩連敗！加上盛傳佢哋個主力前鋒阿祖安拉莫斯下季會過檔多蒙特，對軍心或多或少會造成一定影響。雖然後防約翰布魯克斯剛啱復操無耐未夠態，但消息話佢今場應該重未出得。喺一堆問題困擾之下，又要作客，況且漢堡為自救亦戰意旺盛，呢支首都球隊再輸多場都唔出奇喎！
頂占筍盤：漢堡（主勝）