維拉卡城大駁火

猪拉多纳

今季英超護級形勢超激烈，排第10嘅史雲斯同包尾大幡富咸只有7分之差，其中深受降班威脅嘅諾域治CEO就講過佢寧願死都唔要降班，所以為咗下季能續留英超，各支護級球隊各出奇謀：有6隊已經換帥、7隊喺1月轉會窗簽入至少4個新兵救亡、韋斯咸不惜為護級重要棋子安祖卡路爾嘅紅牌訴諸法庭，可見佢哋為護級乜都做得出，啱啱喺威爾斯打吡戰大敗0比3嘅卡迪夫城今晚主場對阿士東維拉，為護級攞三分一定會狂攻對手，但卡城後防不穩，防線隨時變成「冇掩雞籠」，畀擅打反擊嘅維拉「偷雞」成功，大盤在望。

（now 622周三凌晨3時45分直播）
「蘇B」未執掂防線

點解諾域治CEO會覺得降班比死更難受呢？其實都係錢作怪。由於今季英超嘅電視轉播費創下歷史新高，高達30億鎊（約382億港元），喺各隊都可分享嘅情況下，每隊可分6,300萬鎊，係上季3,900萬鎊嘅1.6倍有多，你話冇得玩嘅代價有幾大呢？所以依家深陷降班漩渦嘅卡迪夫城今場不容有失，卡城改由蘇斯克查領軍後進攻的確有改善，但防守都係唔掂，今場掛住進攻，更唔識防守，隨時畀踢開快速反擊嘅維拉入番轉頭，開出入球大嘅機會好高。