C朗解禁皇馬「體」高一線

猪拉多纳

西班牙盃4強續演馬德里打吡！首回合淨勝3球嘅皇馬，今晚造訪卡達朗球場作客馬體會，將係呢對同市宿敵季內第3度對決，「銀河艦隊」雖然晉級決賽高唱入雲，但前線球員弗到勒唔住，王牌C朗亦如箭在弦，面對陣容天殘地缺嘅馬體會，2.2倍客勝博得過！

（now632台周三凌晨4:00直播）

「銀河艦隊」鋒線近期唔講得笑，日前西甲以4:2砌低維拉利爾，加里夫巴利傷愈落場即刻先拔頭籌，為皇馬射入第3球嘅謝斯洛迪古斯更連續4場有進帳，但最醒神嘅始終係梅開二度嘅賓施馬，呢名法國射手踏入14年後腳風順到冇人有，9場波勁入7球。
馬體會傷停多 韋拿要死頂？

當然啦，貴為王牌C朗點會「坐以待斃」，睇見幾名射手齊齊發威，喺聯賽要坐波監嘅佢，今晚難得「解禁」落場搏殺，唔使問肯定去盡騷哥利，力保「艦隊」No.1射手地位。更何況皇馬今季聯賽首循環主場不敵馬體會，既然西盃首回合成功扳回一城，今晚到訪卡達朗球場相信會以贏波為目標，向宿敵還以顏色嘅同時，亦順手打擊埋對方聯賽爭標氣燄。

首回合落後3球嘅馬體會，本來要追已經唔易，可惜屋漏偏逢連夜雨，繼左閘菲臘路爾斯養傷，箭頭韋拿亦要响賽前再次驗傷，先知道今日有冇機會夾硬落場，中場堤亞高文迪斯更喺上輪聯賽扭傷右膝韌帶長抖，有傷在身嘅門將泰拔高圖爾斯都把關成疑，加埋前線核心迪亞高哥斯達坐波監，連反勝最重要本錢都冇埋，聽做皇馬炮灰！
首回合：馬客負0:3