旋風魅力適時反彈

猪拉多纳

　　昨日有微微雨，今日唔知會唔會灑多陣，場地快慢對揀馬有好大影響，好似上周末，眾人皆知C+3欄利放，點知幾滴雨淋一淋，成個環境唔同晒，啲後上馬忽然生龍活虎，反而放頭馬好多喺直路腳仔軟，所以，以後咪以為幾滴雨唔使理。

　　第一場五班1000米。「不老精英」前季等到季尾先至有攻勢，上季早少少，一月開始上名，今季手法唔同咗，阿達部署呢匹馬搏頭兩場，雖然只得二三名，證明佢唔係唔進取，限米煮限飯之下，真係有諗計求存。

　　「不老精英」呢次出戰最短途，賽績大盲門，本來唔使點理，諗深一層，出擊手法都變得，揀咩路程嚟搏，都唔係死牯牯，尤其呢次1檔並強配，十幾倍抵博。

　　第二場四班1200米。「旋風魅力」落到四班表現未算有大起色，一哩跑過，1200米又跑過，都係交唔出成績，7歲馬戰鬥力今非昔比？阿棟唔排除呢個可能，事關人同馬一樣，老咗就係老咗，唔到我哋唔認，但又冇理由落到四班，負磅唔太重，都跑唔到入三甲，我睇佢應該差唔多時候反彈，就由呢期開始跟。

　　第六場三班1000米。「氣勢如虹」上次擺明輸在出閘唔妥當，放唔出，敗象早呈，不過佢仲可以跑到第四，算係幾本事。

　　唔理呢次係莫雷拉唔騎，定係咩原因，總之，此駒前一場贏得靚，三班唔會冇運行，上仗因意外輸番1場，代表實力唔夠，再加上，轉用田泰安，仲好分啲，隔晚有6倍，臨場亦會有4倍樓上，如果上次大熱有份輸的話，點解唔博翻本。

　　陳華棟 資深評馬人