黑貓闖城+2值博

猪拉多纳

英超快車期預演英格蘭聯賽盃決賽，曼城主場迎戰新特蘭，曼城突然大傷「鋒」，王牌射手阿古路養傷後球隊連續兩場交白卷，兩大中鋒尼格度同迪斯高都不在最佳狀態，唔易打散「黑貓」鐵桶陣，今場讓球主客和「-2」太多，博「讓球客勝」！

（now 623周四凌晨3時45分直播）

曼城今季總士哥數字晨早突破一百大關，全靠射手阿古路帶生整條鋒線，但佢近期受傷休戰，對上兩場缺陣期間球隊攻勢仍然旺盛，但埋門一腳始終差啲，難怪主帥比歷連尼都話好掛住阿古路。比帥好大喜功，四線作戰仍堅持場場強陣，搞到班兵搏殘搏傷，兩大射手尼格度同迪斯高近期各自帶傷搏殺，同樣狀態不足，大軍仲有中場主力拿斯尼及防中費蘭甸奴養傷，戰鬥力大打折扣。
阿當莊臣弗爆「倒戈」

新特蘭進入地獄賽程，未來三場聯賽分別作客曼城、阿仙奴同利物浦，中間夾住兩場盃賽，難踢到癲！不過，隊內士氣高昂，門神文路尼仲話球隊最壞時刻已過。新特蘭近期踢落確係好番好多，前曼城快翼阿當莊臣狀態一流，當選上月最佳球員，今仗「倒戈」有力喺反擊時偷雞。「黑貓」近五次鬥曼城取得三勝一和一負，試過作客同對手踢成3比3，絕對唔係輸硬，今場「+2」輸一粒都有錢收，讓球客勝博得過！