安國倫起孖壓雷神

猪拉多纳

在昨晚賽事後要停賽兩日的安國倫，趁停賽前展開猛烈攻勢，繼剛周六連中三元後，昨晚又憑「過關勇將」及「奇勇」起孖，兩日贏出5W，而後駒更險勝「滿貫豐采」捧走義勇軍盃，騎者起孖兼捧盃，剛戰騎師王不敵莫雷拉，今次則以28分贏出，搶晒莫雷拉鏡。
       
「奇勇」叮噹馬頭下險勝「滿貫豐采」，安國倫及方嘉柏賽後自然飲得杯落。

拚命三郎安國倫昨晚遇上天雨場地又再發威，繼剛周六連中三元後，昨晚又憑「過關勇將」及「奇勇」起孖，後者更捧走全晚唯一錦標義勇軍盃，並為方嘉柏馬房起孖。安國倫昨晚雖然只得五匹坐騎，但最終仍累積兩冠一季，以28分登上騎師王寶座，表現出色。
       
葉楚航讚發揮出色

「過關勇將」練者葉楚航謂：「『過關勇將』的狀態早有水準，季內未贏只是陣上際遇欠佳所致，就以國際騎師賽一役為例，若然鞍上人對場地較為熟悉的話，應該已順利勝出。今仗安國倫跟足策騎指示，出閘後已攝入內欄慳位，直路上左衝右突趕上，贏得甚為出色。馬匹勝出加分後將於三班角逐，估計負輕磅仍有望一爭。」
       

「奇勇」近況復甦，順利於安國倫胯下取得連捷，方嘉柏表示：「『奇勇』上仗後加9分幅度甚大，今需負頂磅上陣，實為爭勝添障礙。今場安國倫做好本分，發揮無可挑剔，加上有點運氣，最終能再下一城。」方嘉柏季內谷草贏得14W，暫領先群雄。