哥古夫復出里昂大「斯」殺

猪拉多纳

要數近排法甲邊隊波狀態最好，里昂肯定榜上有名，佢哋喺歇冬後9場比賽贏咗8場。今晚喺法國足總盃16強主場恭候法乙嘅朗斯，贏多場問題唔大，撐2.1倍「讓主」。

（開賽時間：周五凌晨3:45）
朗斯表現跌Watt

里昂季初表現雖然不穩，但佢哋自從由上年12月起愈打愈好，近15戰僅1敗。佢哋上個禮拜四更砌低特魯瓦，成功殺入法國聯賽盃決賽，球隊上下士氣正值巔峰。一對箭頭拿卡錫迪、巴菲迪比高美斯亦腳風大順，近4仗合共攻入7球，加上復出嘅中場哥古夫穿針引線，足夠射爆對手大門。

朗斯最近表現回落，繼主場同護級球隊拉瓦勒互交白卷後，上仗作客特魯瓦又臨尾香輸0:1，今次對住喺國內盃賽場場至少入兩粒嘅里昂睇怕都冇運行。