諾在其中:星火燎原勝券在握

不死鸟

香港已經發現首宗豬流感個案，消息一出即人心惶惶，其中有個住喺紐約嘅朋友，佢話嗰邊冇乜人帶口罩，成條街人來人往，好似未曾爆發豬流感一樣﹔但香港一話有豬流感，佢哋住喺香港的親戚朋友即猛咁打電話畀佢，叫佢唔好出咁多街。其實我哋咁緊張，主要係香港經歷過沙士，所以希望大家做好準備，提防豬流感擴散。 天祿表現穩定         講番今日沙田十場賽事，第三場三班泥地一哩蒲偉士碟，「天祿」至今四戰三度入位，可惜就仲未能夠開齋，前仗同程輸短頭畀「好芝味」跑第二，首次跑泥地賽就有咁好嘅表現，證明場地性能相當合適，埋門狀態穩定之餘，兼且「天祿」只負一二二磅，仲要受讓「好芝味」五磅有着數，一於做膽。         「好芝味」上仗同程後上贏馬，排十檔下末段走勢如狼似虎，就知依家仲有分咗手，既然「天祿」、「穿針引線」同「風馳電掣」都係佢蹄下敗將，配腳當然唔少得。「穿針引線」上仗轉彎入直路嗰陣曾墮退，但入直路後居然能重新發力，喺走勢唔順下跑得一席接近咗第四，續負輕磅要拖。「風馳電掣」埋門狀態唔曳，初配潘頓或者有驚喜。         另一場心水係第八場三班一千米李福深盃，同程表現準繩嘅「皇仁神駒」退出後，餘下各駒應以「星火燎原」嘅勝算最大，呢匹馬至今四戰三捷，頭馬全部都係跑直路賽取得，雖然冼毅力被罰即時停賽冇得騎，但勞愛德嘅騎功亦有保證，抽得十三檔有利，可做重心。         配腳方面，「常山鳳寶」上場捧成大熱門跑第三，證明近態唔曳，重配主帥白德民或有更佳發揮，要拖埋。「好新聞」同「相見歡」上仗輕勝同程，質新當打馬宜一併兼顧。