漢堡鐵杆粉絲盡訴心中情

猪拉多纳

德國嘅球迷總會係其中一支球隊嘅忠實粉絲，博愛者並非多數。大家點解會忠於一隊波？可能因為喺你兒時已愛上，可能因為你深愛某一位球員，可能因為受家人影響，亦可能因為某隊喺某一刻嘅演出深深打動你嘅神經。德國人同好多其他球迷嘅分別，係我哋極少見異思遷，無論球隊成與敗，都會陪住一齊慶祝、狂呼或哭泣。近年拜仁球迷當然幸福，可以連續不斷地享受球隊勝利同精彩演出；漢堡球迷注定要陪球隊面對痛苦，接受恥辱；至於布倫瑞克球迷，喺過去20年來只有夢想同期待。

Oliver係漢堡嘅鐵杆粉絲，始於70年代尾，爸爸已經帶只得幾歲嘅我入球場睇波，睇我哋嘅傳奇球星奇雲基瑾、馬加夫、卡爾茨同賀巴殊比賽，呢班家喻戶曉嘅球星，喺那些年嘅幾年間，為漢堡贏得德甲、德國盃甚至歐冠盃，係該段時期地上最強，對於當時我呢個小朋友，成為漢堡球迷絕對係明智決定，可惜自從1987年捧德國盃後，冇人估計到，我哋直至今日都無法再贏取任何錦標。
為林志堅被錯用抱不平

漢堡監事會近年喺用人同理財各方面都頻頻犯大錯，目前形勢更水深火熱，好多球員根本冇德甲水準，尤其防線超唔掂，近期起用嘅18歲小將莊拿芬泰希畢竟年紀太輕，不作批評，但連錯漏百出嘅前阿仙奴失敗球員佐羅都一直得到重用，就真係冇眼睇，至於香港球迷關心嘅林志堅，擺明係一位進攻型中場，偏偏要佢客串打二閘，面對拜仁慘遭馬里奧葛斯完爆亦無話可說了！至於前線，原本只得拉蘇加同魯特尼夫斯兩個較有級數，但體育總監卻奧沙竟然冇理會球隊需要救亡，喺歇冬期將魯特尼夫斯借咗去漢諾威，如今拉蘇加有傷，前線仲邊有人入到波？
作客布倫瑞克寧捧主隊

漢堡今晚生死戰作客布倫瑞克，主隊升班以來證明未夠德甲水準，一味倚靠防守同鬥志，所以每攞一分都值得開派對慶祝，佢哋嘅球迷經歷20年漫長等待，變得相當謙遜。布倫瑞克今仗判輸嚟打，相反漢堡非勝不可，壓力喺作客一方；布倫瑞克可以戰鬥，可以狂奔，但漢堡做唔到，近兩場聯賽，漢堡球員奔跑比對手少差不多十公里，近期陣中只有雲達華治同巴迪積兩名中場球員配得上我哋嘅球衣，不過兩人都喺對拜仁嘅德國盃受傷，今晚能否上陣成疑。

漢堡球員喺雲馬維克手上根本睇唔到求勝欲望，唔換教練好難有起色，呢場如果要投X，我會將注碼押喺布倫瑞克身上。

（周六晚10時30分開賽）
Oliver 推介：

布倫瑞克平手盤 3★

多蒙特讓球勝 3★

史浩克04下盤 3★