天佑曼城叉足電拆車復仇

猪拉多纳

剋星泰利卡希爾養傷缺陣

喺邊度跌低要喺邊度企番起身！今個月初被車路士打破英超主場不敗身嘅曼城，今晚再喺英格蘭足總盃16強迎戰車仔，不過風水輪流轉，「藍月亮」日前聯賽快車由於天氣問題延期，球員得以保留體力之外，車仔更有上次守到曼城一同戈都冇嘅中堅拍檔加利卡希爾同泰利缺陣，曼城今鋪天時地利人和，一於捧2倍主勝，見證佢哋點樣搵「寸王」復仇。

（now621、633及635台周日凌晨1:15直播）

曼城本來要面對魔鬼賽程，分別喺英超迎戰新特蘭、今場足總盃激戰車路士，同埋歐聯惡鬥巴塞，7日內連踢3場都咪話唔惡啃。好在佢哋有「天公作美」，周中曼徹斯特市由於暴風吹襲，最終令「藍月鬥黑貓」嘅聯賽被迫改期，「魔鬼頭關」不戰而過。

曼城自從被車路士打破聯賽主場不敗金身後，跟住作客諾域治亦久攻不下，球員信心似乎有啲動搖，不過相比車路士繼續開行快車，最終衰收尾被西布朗逼和，曼城今勻賺盡體力之餘，亦正好趁住車仔勢頭轉弱贏波重整旗鼓。
「寸王」唔重視足總盃收起夏薩特 奧斯卡

雖然箭頭阿古路受傷高掛免戰牌，幸好曼城前線仲有祖維迪、尼格度同迪斯高孭飛，後兩者喺聯賽固然煞食，踢盃賽更加特別醒神，喺近6場本土盃賽夾手夾腳炮製14個入球，配合耶耶托尼喺中場擔大旗，同埋捷西斯拿華斯及大衞施華兩翼側擊，一個字，掂！

當然啦，筆者點會忘記莫連奴憑一招穩守突擊砌低曼城，不過足總盃喺「寸王」眼中只排第3位，重要性遠遠唔及英超同歐聯。賽前唔少英國傳媒吹到行，話佢今仗會收起拉美利斯、夏薩特同奧斯卡杜斯山度士等眾多主將，至於喺聯賽守到曼城一戙都冇嘅中堅拍檔泰利同加利卡希爾亦要養傷。「藍戰士」以副選應戰兼中門大開，曼城復仇指日可待！
Data King 車仔近期客戰半場從未落後

車路士近16場作客賽事半場從未落後，「半贏」及「半和」分別開出8次。

曼城近15戰主場鬥車路士冇和過，「藍月亮」取得5勝10負成績。

以2.5球中位數計算，雙方近32次對碰「入球大細」分別各開16次。
乜都玩錦囊 大戰鬥穩博1.95倍細

曼城月初同車路士交手畀對方嘅防反戰術玩殘，為免喺一季之內輸3次畀車仔咁失威，相信比歷連尼今鋪會穩打穩紮，冇咁易再畀藍戰士反擊得手，而且車仔收起主將火力大減，玩1.95倍「入球細」啱數！