水鬥水求穩行先悉尼 光輝難分高低

猪拉多纳

澳職今日有場FC悉尼主場對珀斯光輝，家陣兩隊都喺下游掙扎，雙方教練法連拿同路維亦備受壓力，今鋪但求唔輸以守為先，況且呢兩班波狀態都係麻麻，彼此實力又半斤八両，之前7次對賽從未試過有多過一球嘅勝負差距，有晒根據，今場一於博個3.2倍和波啦！

（有線64及203周六下午2:30直播）
悉尼粉絲要教練落台

FC悉尼上場吞咗阿德萊德聯三蛋後，激到一大批球迷去抗議，要求教練法連拿下台，更有部分粉絲因拒絕交出示威橫額，搞到被逐出球場！法連拿日前就喺網上嘅「部落格」度回應，話已經聽到大家嘅聲音，仲保證會盡力執好隊波以求盡快重返正軌喎。不過以悉尼近5場聯賽輸足4場嘅狀態嚟睇，呢個都係「願望」嚟嘅啫，今日可以攞番1分都偷笑喇！

珀斯光輝喺一月份接連簽入些拿斯、格菲斯同馬連高域三件新兵，教練路維當然要交貨，可惜呢班波近4場聯賽得2和2負，等緊嗰場勝仗仲未出現！事實上，呢班新球員嘅加盟無疑係可以提升隊波嘅實力，但從另一方面睇，隊波突然間有咁大變動，都需要時間調節啦，睇嚟光輝今場波都係以穩為先，贏唔出都起碼唔好輸先嘛！
頂占筍盤：FC悉尼（和）