白禮頓獵殺「病虎」

猪拉多纳

英冠白禮頓，今晚打老虎！綽號「海鷗」嘅白禮頓，踏入新一年後振翅高飛，喺自己地頭連續5場冇輸過，更正值4連勝強勢，今晚出戰英格蘭足總盃16強，越級挑戰英超「老虎」侯城，趁住對手防線傷兵滿營，贏波晉級話咁易，2.12倍主W咪錯過。

（now621、632及633台周二凌晨3:45直播）

今季主場戰績唔錯嘅白禮頓，就連英冠聯賽一、二哥嘅李斯特城同般尼嚟到都要擺低3分，踏入14年後表現更加標青，首戰打和般尼茅夫1:1後，跟住喺足總盃同聯賽打出一段4連勝氣勢，期間仲要一球不失，硬淨到你唔信。

雖然「海鷗」教頭奧斯卡，喺足總盃例牌收起首席門將古斯錫同射手荷西烏路亞，不過對上兩圈擔正把關嘅比蘇雲演出淡定，問題不大。至於前線有年輕具活力嘅熱刺借將莊拿芬奧比卡數胡，同埋中場大腦奧蘭迪鋪橋搭路外，翼鋒韋畢卡利亦都傷愈復出，進攻火力不容小覷。
侯城傷兵多寧留力護級

至於侯城對待英足盃雖則態度認真，對上兩圈作客擊敗米杜士堡同修安聯，可惜上輪英超不敵修咸頓後，現時排第13名睇落中游穩穩陣陣，但實際距離降班區域只得3分，相信教頭布魯士權衡過輕重，都會以護級為先。

更何況侯城真係要搏都根本冇本錢，喺冬季重金羅致嘅謝拉域同沙恩朗，由於唔符合上陣資格冇得落場，改由法耶特同艾奴高孭飛，成效存疑。同時「老虎」守將占士謝斯達上月中受傷證實要抖兩個月後，羅仙尼亞同麥沙尼亦排住隊入埋十字軍，防線殘成咁，點捧得落手。